World Women Day: ગુજરાતમાં પીએમ મોદીની સુરક્ષામાં મહિલા પોલીસ તૈનાત, નવો ઇતિહાસ રચાશે
આવતીકાલે નવસારી વડાપ્રધાન નરેન્દ્ર મોદીની હેલીપેડ થી લઈને કાર્યક્રમ સ્થળ સુધીની સુરક્ષા ૨૪૨૦ પોલીસ મહિલા અધિકારીઓ કરશે
નવસારી: નવસારીમાં વડાપ્રધાન નરેન્દ્ર મોદીના કાર્યક્રમમાં સુરક્ષા વ્યવસ્થા માટે 2420 મહિલા પોલીસ અધિકારીઓ તૈનાત રહેશે. આ મહિલા અધિકારીઓ હેલિપેડથી લઈને કાર્યક્રમ સ્થળ સુધીની સુરક્ષા જવાબદારી સંભાળશે. બે દિવસના દક્ષિણ ગુજરાત પ્રવાસે આવેલા વડાપ્રધાન મોદી 8 માર્ચે વિશ્વ મહિલા દિવસ નિમિત્તે નવસારીના વાંસી બોરસી ગામ ખાતે “લખપતિ દીદી કાર્યક્રમ”માં ઉપસ્થિત રહેશે.
આ 8 માર્ચ વિશ્વ મહિલા દિવસે ગુજરાતમાં ઇતિહાસ રચાવા જઈ રહ્યો છે. પહેલીવાર, પ્રધાનમંત્રી મોદીની સુરક્ષામાં મહિલા પોલીસ કર્મીઓ તૈનાત રહેશે. હેલિપેડથી કાર્યક્રમ સ્થળ, બેઠક વ્યવસ્થા અને સમગ્ર કાર્યક્રમ દરમિયાન સુરક્ષા વ્યવસ્થા મહિલા પોલીસ દ્વારા સંભાળવામાં આવશે. અત્યાર સુધી ફક્ત પુરુષ પોલીસ જવાનો અને અધિકારીઓ જ PM મોદીની સુરક્ષામાં તૈનાત રહેતા હતા.
વડાપ્રધાન નરેન્દ્ર મોદી જે વિશ્વ મંચ પર મહિલા સશક્તિકરણની વાત કરે છે તેનું પ્રતિબિંબ 8 માર્ચના રોજ જોવા મળશે. રાજ્યના ગૃહ વિભાગના જણાવ્યા અનુસાર, 8 માર્ચે મહિલા પોલીસ અધિકારીઓ પીએમ મોદીની સુરક્ષાની જવાબદારી નિભાવશે. 2165 મહિલા કોન્સ્ટેબલ, 187 મહિલા પીએસઆઈ, 61 મહિલા પીઆઈ, 5 મહિલા એસપી અને 16 મહિલા ડીવાયએસપી સુરક્ષા વ્યવસ્થામાં તૈનાત રહેશે. જ્યારે ટ્રાફિક વ્યવસ્થા પુરુષ પોલીસ સંભાળશે. આ કાર્યક્રમમાં 3 જિલ્લામાંથી 1 લાખથી વધુ બહેનો હાજર રહેશે. હેલિપેડથી લઈને મંચ સુધી પીએમ મોદીની સુરક્ષાની જવાબદારી મહિલા પોલીસ અધિકારીઓના હાથમાં રહેશે.
આઠમી માર્ચના રોજ ઉજવાતા આંતરરાષ્ટ્રીય મહિલા દિવસ નિમિત્તે ગુજરાતમાં પોલીસ વિભાગ એક ઐતિહાસિક પહેલ કરશે. વડાપ્રધાન નરેન્દ્ર મોદીની સુરક્ષાની જવાબદારી મહિલા પોલીસ કર્મીઓ સંભાળશે. આ અનોખી ઉજવણી પીએમ મોદીની હાજરીમાં યોજાશે.
