જ્ઞાનપ્રકાશ વિરપુર આવીને માફી ન માંગે તો જલદ આંદોલન કરવામાં આવશે
રાજકોટ લોહાણા મહાજને સ્વામિનારાયણ સંપ્રદાયના સ્વામી જ્ઞાનપ્રકાશ વિરુદ્ધ આંદોલનની ચેતવણી ઉચ્ચારી છે. મહાજનના પ્રમુખ અને કારોબારી પ્રમુખ સંયુક્ત નિવેદનમાં જણાવ્યું છે કે સુરતના અમરોલી ખાતે આવેલ સ્વામિનારાયણ સંપ્રદાયના સ્વામી જ્ઞાનપ્રકાશે તાજેતરમાં એક સભામાં પૂજ્ય જલારામ બાપા અંગે અયોગ્ય અને નિરર્થક નિવેદન આપ્યું છે.
તેમના જણાવ્યા અનુસાર, સ્વામી જ્ઞાનપ્રકાશે પૂજ્ય જલારામ બાપાના સદ્ગુણો અને કાર્ય અંગે અપમાનજનક ટિપ્પણીઓ કરી સમાજમાં વિખવાદ ઊભો કરવાનો પ્રયાસ કર્યો છે, જે કદી પણ સહન કરવામાં આવશે નહીં. મહાજનના નેતાઓએ સ્પષ્ટ શબ્દોમાં કહ્યું છે કે જો સ્વામી જ્ઞાનપ્રકાશ તાત્કાલિક વીરપુર આવી, પૂજ્ય જલારામ બાપાની માફી નહીં માંગે, તો આગામી દિવસોમાં આંદોલનાત્મક પગલાં લેવામાં આવશે.
વિશેષમાં, મહાજન દ્વારા એમ પણ જણાવવામાં આવ્યું કે પૂજ્ય જલારામ બાપા માત્ર લોહાણા જ્ઞાતિ માટે નહીં, પરંતુ સમસ્ત સમાજ અને વિવિધ ધર્મોના શ્રદ્ધાળુઓ માટે પૂજનીય છે. તેથી, આવા નિવેદનો આપનારા સ્વામી સામે પગલાં ભરવા સ્વામિનારાયણ સંપ્રદાયે પણ વિચારવું જોઈએ.
અંતમાં સ્પષ્ટતા કરી કે પૂજ્ય જલારામ બાપાના પરિવાર દ્વારા જે પણ નિર્ણય લેવામાં આવશે, તેમાં રાજકોટ લોહાણા મહાજન સંપૂર્ણ સમર્થન આપશે અને જો માફી નહીં માંગી જાય, તો સમગ્ર સમાજને સાથે રાખી ઉગ્ર આંદોલન કરવામાં આવશે.
