જલારામ બાપા પર ટિપ્પણીને લઈ ભક્તોમાં રોષ, 2 દિવસ વિરપુર બંધનું એલાન
રાજકોટમાં જલારામ બાપા પર જ્ઞાનપ્રકાશ સ્વામીએ આપેલા વિવાદિત નિવેદનને કારણે લોકોમાં ભારે આક્રોશ જોવા મળી રહ્યો છે. વિરપુરમાં બંધને સમગ્ર સમર્થન મળ્યું, અને વેપારીઓએ દુકાનોના શટર બંધ રાખી પ્રતિક્રિયા દર્શાવી. ભક્તોના હૃદયમાં જલારામ બાપાની ઊંડી શ્રદ્ધા હોવાથી, આ નિવેદન સામે લોકોમાં અસંતોષ વ્યાપી રહ્યો છે.
જલારામ બાપા પર કરાયેલી ટિપ્પણીના મામલે નવો વળાંક આવ્યો છે. વેપારીઓ અને ભાવિકો આ વિરોધમાં સ્વયંસ્ફૂર્ત રીતે જોડાયા હોવાનો દાવો થઈ રહ્યો છે. કેટલાક લોકોએ તો જ્ઞાનપ્રકાશ સ્વામીની માફી સ્વીકારવાની મનાઈ કરી છે, એમ માનવામાં આવે છે કે જો એકવાર માફી અપાઈ તો ભવિષ્યમાં કોઈ પણ ગમે તેમ બોલી શકશે. કેટલાક ભક્તો તો સ્વામીને કાનૂની સજા આપવામાં આવે તેવી પણ માગ ઉઠાવી રહ્યા છે.
આ વિવાદની વધુ વિગતોમાં, જ્ઞાનપ્રકાશ સ્વામીએ સ્પષ્ટતા કરી છે કે તેમણે પોતાની તરફથી કોઈ નવી ટિપ્પણી નથી કરી, પણ માત્ર એક પુસ્તકમાંથી લેખ વાંચ્યો હતો. ‘સદગુરુ ગાથા’ નામના પુસ્તકમાં ‘વીરપુરમાં જલાભગતને આશીર્વાદ’ શીર્ષક હેઠળ આ પ્રસંગ ઉલ્લેખાયો છે. આ પુસ્તક સ્વામી માધવપ્રિયદાસજી દ્વારા લખાયું અને 2014માં અમદાવાદની સ્વામિનારાયણ ગુરુકુલ વિશ્વવિધા પ્રતિષ્ઠાનમ દ્વારા પ્રકાશિત થયું હતું. આ પુસ્તકમાંથી ઉલ્લેખિત લેખ વાંચ્યાનો દાવો કરતાં, જ્ઞાનપ્રકાશ સ્વામીએ માફી માંગી છે.
