વાવાઝોડું ‘શક્તિ’ તીવ્ર તોફાની ચક્રવાતમાં ફેરવાયું, 13 કિ.મી.ની ઝડપે પશ્ચિમ તરફ વધી રહ્યું છે આગળ

ગુજરાત નજીક અરબી સમુદ્રમાં આકાર પામેલું વાવાઝોડું આજે સવારે તીવ્ર ચક્રવાતી તોફાનમાં પરિવર્તિત થયું છે. વાવાઝોડું 13 કિ મી. પ્રતિ કલાકની ઝડપે પશ્ચિમ દિશામાં આગળ વધી રહ્યું છે. આજે સવારે 5:30 વાગ્યાની સ્થિતિએ શક્તિ’ વાવાઝોડું ગુજરાતના દરિયાકાંઠાથી 400 કિ.મી દૂર છે અને પશ્ચિમ-દક્ષિણપશ્ચિમ દિશામાં આગળ વધવાની સંભાવના છે અને 5મી ઓક્ટોબર સુધીમાં તે વાયવ્ય અને તેને અડીને આવેલા પશ્ચિમ મધ્ય અરબી સમુદ્ર સુધી પહોંચી શકે છે.

વાવાઝોડું ‘શક્તિ’ ગુજરાતથી કેટલા કી.મી. દૂર

આજે, 4થી ઓક્ટોબર 2025ના રોજ સવારે 5.30 વાગ્યે ઉત્તરપૂર્વ અરબી સમુદ્રમાં 22.0 ઉત્તર અક્ષાંશ અને 65.0 પૂર્વ રેખાંશ પર કેન્દ્રિત હતું. છેલ્લા છ કલાક દરમિયાન આ વાવાઝોડું 13 કિલોમીટર પ્રતિ કલાકની ઝડપે પશ્ચિમ દિશામાં આગળ વધ્યું છે. આ વાવાઝોડું દ્વારકાથી પશ્ચિમમાં લગભગ 420 કિ.મી., નલિયાથી પશ્ચિમ-દક્ષિણપશ્ચિમમાં 420 કિ.મી., પાકિસ્તાનના કરાચીથી દક્ષિણ-દક્ષિણપશ્ચિમમાં 390 કિ.મી. અને પોરબંદરથી પશ્ચિમમાં 480 કિ.મી. દૂર સ્થિત છે.

વાવાઝોડું ‘શક્તિ’ આજે વધુ તીવ્ર બન્યુ

હવામાન વિભાગના પૂર્વાનુમાન મુજબ, ‘શક્તિ’ પશ્ચિમ-દક્ષિણપશ્ચિમ દિશામાં આગળ વધવાની અને 4 ઓક્ટોબર, 2025ની સવારે ગંભીર ચક્રવાતી વાવાઝોડામાં વધુ તીવ્ર બન્યું છે. ત્યારબાદ, તે પશ્ચિમ-દક્ષિણપશ્ચિમ તરફ આગળ વધવાનું ચાલુ રાખશે અને 5 ઓક્ટોબર સુધીમાં ઉત્તર અને નજીકના મધ્ય અરબી સમુદ્રના મધ્ય ભાગોમાં પહોંચશે. 6 ઓક્ટોબરની સવારથી તે પૂર્વ-ઉત્તરપૂર્વ તરફ વળીને આગળ વધશે.

કેટલી ઝડપથી ફૂંકાઈ શકે છે પવન

• પવનની ગતિ અંગેની ચેતવણી અનુસાર, ઉત્તર-પશ્ચિમ અરબી સમુદ્ર અને નજીકના ઉત્તરપૂર્વ અરબી સમુદ્રમાં 4 ઓક્ટોબરની સવાર સુધીમાં 80-90 કિલોમીટર પ્રતિ કલાકથી 100 કિલોમીટર પ્રતિ કલાક અને પછી 90-100 કિલોમીટર પ્રતિ કલાકથી 110 કિલોમીટર પ્રતિ કલાકની ઝડપે પવન ફૂંકાશે.
• 4 ઓક્ટોબરની સાંજ સુધીમાં આ ગતિ 100-110 કિલોમીટર પ્રતિ કલાકથી વધીને 125 કિલોમીટર પ્રતિ કલાક સુધી પહોંચી શકે છે. ત્યારબાદ, 6 ઓક્ટોબરની સવાર સુધીમાં પવનની ગતિ 80-90 કિલોમીટર પ્રતિ કલાકથી 100 કિલોમીટર પ્રતિ કલાક અને 7 ઓક્ટોબરની સવાર સુધીમાં 60-70 કિલોમીટર પ્રતિ કલાકથી 80 કિલોમીટર પ્રતિ કલાક સુધી ધીમે ધીમે ઘટશે.
• મધ્ય અરબી સમુદ્ર પર 55-65 કિલોમીટર પ્રતિ કલાકથી 65 કિલોમીટર પ્રતિ કલાકની ઝડપે પવન ફૂંકાઈ રહ્યો છે, જે 4 ઓક્ટોબર, 2025ની રાતથી બપોર સુધીમાં 65-75 કિલોમીટર પ્રતિ કલાકથી 100-110 કિલોમીટર પ્રતિ કલાક સુધી અને 5 ઓક્ટોબર, 2025ની રાતથી બપોર સુધીમાં 125 કિલોમીટર પ્રતિ કલાક સુધી પહોંચી શકે છે.
• ત્યારબાદ, 6 ઓક્ટોબરની સવારે પવનની ગતિ ધીમે ધીમે ઘટીને 70-80 કિલોમીટર પ્રતિ કલાકથી 90 કિલોમીટર પ્રતિ કલાક અને 7 ઓક્ટોબરની સવારે 60-70 કિલોમીટર પ્રતિ કલાક થશે. ગુજરાત-ઉત્તર મહારાષ્ટ્રના દરિયાકાંઠે 3 થી 5 ઓક્ટોબર દરમિયાન 45-55 કિલોમીટર પ્રતિ કલાકથી 65 કિલોમીટર પ્રતિ કલાકની ઝડપે પવન ફૂંકાઈ શકે છે.

કેવી અરબી સમુદ્રમાં દરિયાઈ સ્થિતિ

દરિયાઈ સ્થિતિની વાત કરીએ તો, 3 થી 7 ઓક્ટોબર દરમિયાન ઉત્તરપશ્ચિમ અને નજીકના ઉત્તરપૂર્વ અરબી સમુદ્રમાં દરિયાઈ સ્થિતિ ‘ખૂબ જ ઊંચી’ (very high) રહેવાની સંભાવના છે. મધ્ય અરબી સમુદ્રના નજીકના વિસ્તારોમાં 3 થી 5 ઓક્ટોબરની સાંજ દરમિયાન અને 5 ઓક્ટોબરથી 7 ઓક્ટોબરની મધ્યરાત્રિ સુધી દરિયાઈ સ્થિતિ ‘ખૂબ જ ઊંચી’ રહેશે. ગુજરાત-ઉત્તર મહારાષ્ટ્ર કિનારો અને પાકિસ્તાન કિનારે 5 ઓક્ટોબર સુધી દરિયાઈ સ્થિતિ ‘ખૂબ જ ઊંચી’ રહેવાની શક્યતા છે.

માછીમારો માટે શું છે ચેતવણી

માછીમારોને સ્પષ્ટપણે ચેતવણી આપવામાં આવી છે કે તેઓ 7 ઓક્ટોબર દરમિયાન ઉત્તરપશ્ચિમ અરબી સમુદ્ર, ઉત્તરપૂર્વ અરબી સમુદ્રના અડીને આવેલા વિસ્તારો, મધ્ય અરબી સમુદ્ર અને ગુજરાત-ઉત્તર મહારાષ્ટ્ર કિનારે તથા તેની બહારના વિસ્તારોમાં દરિયામાં ન જાય.

આ વાવાઝોડાની ગતિવિધિઓ પર હવામાન વિભાગ દ્વારા સતત નજર રાખવામાં આવી રહી છે અને સમયાંતરે નવીનતમ માહિતી પૂરી પાડવામાં આવશે. સંબંધિત તંત્ર અને નાગરિકોને સાવચેત રહેવા અને અપડેટ્સ પર ધ્યાન આપવા અપીલ કરવામાં આવી છે.