PM Modi South Africa: AI, એડવાન્સ ટેક્નોલોજી, ક્લીન એનર્જી… ભારત, ઓસ્ટ્રેલિયા અને કેનેડા વચ્ચે એક મહત્વપૂર્ણ પાર્ટનરશિપ
દક્ષિણ આફ્રિકાના જોહાન્સબર્ગમાં યોજાયેલા G20 સમિટ દરમિયાન ભારત, ઓસ્ટ્રેલિયા અને કેનેડા વચ્ચે એક મહત્વપૂર્ણ પાર્ટનરશિપ કરવામાં આવી છે. આ કરાર હેઠળ ત્રણેય દેશો મળીને એડવાન્સ ટેક્નોલોજી, આર્ટિફિશિયલ ઇન્ટેલિજન્સ (AI) અને ક્લીન એનર્જી જેવા ક્ષેત્રોમાં કામ કરશે. સમિટ દરમિયાન આ ત્રિપક્ષીય બેઠક યોજાઈ હતી, જેમાં આ ભાગીદારીને અંતિમ સ્વરૂપ આપવામાં આવ્યું.
ACITI ભાગીદારીની જાહેરાત
સાઉથ આફ્રિકાના જોહાન્સબર્ગમાં G20 સમિટ દરમિયાન, વડાપ્રધાન મોદીએ ઓસ્ટ્રેલિયા અને કેનેડા સાથે ટેક્નોલોજી એન્ડ ઇનોવેશન (ACITI) પાર્ટનરશિપની જાહેરાત કરી. વડાપ્રધાન મોદીએ ઓસ્ટ્રેલિયાના વડાપ્રધાન એન્થની અલ્બનીઝ અને કેનેડાના વડાપ્રધાન માર્ક કાર્ની સાથેની મુલાકાત બાદ આ જાહેરાત કરી હતી. આ સમજૂતી હેઠળ ભારત, ઓસ્ટ્રેલિયા અને કેનેડાએ ઓસ્ટ્રેલિયા-કેનેડા-ઇન્ડિયા ટેક્નોલોજી એન્ડ ઇનોવેશન (ACITI) પાર્ટનરશિપ નામની નવી ત્રિપક્ષીય ટેક્નોલોજી અને ઇનોવેશન ભાગીદારીમાં પ્રવેશવા સંમતિ આપી. ત્રણેય પક્ષો જટિલ અને ઉભરતી ટેક્નોલોજીઓ પર સહકારની તેમની મહત્વાકાંક્ષાને મજબૂત કરવા સંમત થયા છે.
ભાગીદારીનો મુખ્ય ઉદ્દેશ્ય
વડાપ્રધાન મોદીના જણાવ્યા અનુસાર ઇન્ડિયા-ઓસ્ટ્રેલિયા-કેનેડા ટેક્નોલોજી એન્ડ ઇનોવેશન (ACITI) પાર્ટનરશિપનો મુખ્ય ઉદ્દેશ્ય સપ્લાય ચેઇનને માત્ર એક દેશ પર નિર્ભર ન રાખતા તેને અનેક દેશોમાં ફેલાવવાનો છે. આ ઉપરાંત આ ભાગીદારીનો હેતુ ક્લીન એનર્જીને પ્રોત્સાહન આપવાનો અને આર્ટિફિશિયલ ઇન્ટેલિજન્સ (AI)નો મોટા પાયે ઉપયોગ કરવાનો છે. આ પહેલ દ્વારા ત્રણેય દેશો એકબીજાની કુદરતી શક્તિઓનો લાભ ઉઠાવશે. આર્ટિફિશિયલ ઇન્ટેલિજન્સને માનવ જીવનને બહેતર બનાવવા માટે વધુ સરળ બનાવવામાં આવશે.
PM મોદીએ ટ્વીટ કરીને વ્યક્ત કરી ખુશી
વડાપ્રધાન મોદીએ બંને દેશોના નેતાઓ સાથે વાતચીત કર્યા પછી આ ભાગીદારીની જાહેરાત કરી હતી અને ટ્વીટ કરીને પોતાની ખુશી વ્યક્ત કરી હતી. તેમણે ટ્વીટમાં લખ્યું કે આ એક નવી ત્રિપક્ષીય ટેક્નોલોજી એન્ડ ઇનોવેશન પાર્ટનરશિપ છે. તેમણે જોહાન્સબર્ગમાં G20 શિખર સંમેલન દરમિયાન ઓસ્ટ્રેલિયાના વડાપ્રધાન એન્થની અલ્બનીઝ અને કેનેડાના વડાપ્રધાન માર્ક કાર્ની સાથેની બેઠકને શાનદાર ગણાવી હતી. તેમણે આનંદ વ્યક્ત કર્યો કે ત્રણેય દેશો આવનારી પેઢીઓ માટે બહેતર ભવિષ્ય સુનિશ્ચિત કરવા માટે સાથે મળીને કામ કરશે. ACITI પાર્ટનરશિપ હેઠળ આગળનું પગલું નક્કી કરવામાં આવ્યું છે. આ ભાગીદારીના ભાગ રૂપે ત્રણેય દેશોના પ્રતિનિધિઓ વચ્ચેની પ્રથમ બેઠક વર્ષ 2026 માં યોજવામાં આવશે.
