એશિયા કપ 2025: હાથ ન મિલાવ્યા તો ભડક્યું પાકિસ્તાન, ભારતીય ટીમ સહિત મેચ રેફરી વિરુદ્ધ કરી દીધી ફરિયાદ
એશિયા કપ 2025માં ભારતીય ટીમે પાકિસ્તાન સામે રવિવારે દુબઈમાં સાત વિકેટે યાદગાર જીત નોંધાવી હતી. જોકે ભારતની આ જીત પર પાકિસ્તાન ભારે ગુસ્સે ભરાયું છે. ‘હેન્ડશેક’ પરંપરાનું પાલન ન કરવા પર પાકિસ્તાને ભારતીય ટીમના વર્તન સામે સવાલો ઉઠાવ્યા છે અને ટીમ સહિત મેચ રેફરી સામે પણ વિરોધ નોંધાવ્યો છે.
સૂર્યકુમાર યાદવે હેન્ડશેક ન કરવા પર શું કહ્યું
ભારતીય કેપ્ટન સૂર્યકુમાર યાદવે પાકિસ્તાની કેપ્ટન સલમાન આગા સાથે ના તો ટોસ સમયે હાથ મિલાવ્યા અને ના મેચ પછી. તેઓ સીધા ડ્રેસિંગ રૂમમાં ચાલ્યા ગયા હતા. મેચ પછીના પુરસ્કાર વિતરણ સમારોહમાં સૂર્યાએ પહેલગામમાં થયેલા આતંકી હુમલાનો ઉલ્લેખ કર્યો અને આ જીત આર્મ્ડ ફોર્સને સમર્પિત કરી. હેન્ડશેક ન કરવા પર સ્પષ્ટતા કરતાં સૂર્યકુમાર યાદવે કહ્યું કે અમે ફક્ત રમત રમવા આવ્યા છીએ અને પાકિસ્તાનને જડબાતોડ જવાબ આપ્યો.
પાકિસ્તાને કરી ફરિયાદ
પાકિસ્તાન ક્રિકેટ બોર્ડ (PCB) ને પુષ્ટિ કરી છે કે પાકિસ્તાન ટીમના મેનેજર નવીદ અખ્તર ચીમાએ ભારતીય ટીમના ‘અયોગ્ય વર્તન’ સામે સત્તાવાર રીતે વિરોધ નોંધાવ્યો છે. પીસીબીએએમ પણ કહ્યું કે મેનેજર ચીમાએ મેચ રેફરીના વર્તન સામે પણ સત્તાવાર વિરોધ નોંધાવ્યો હતો, કારણ કે તેમણે બંને કેપ્ટનોને ટોસ સમયે હાથ ન મિલાવવાની વિનંતી કરી હતી.
બીજી તરફ પાકિસ્તાનના કેપ્ટન સલમાન અલી આગા પોસ્ટ-મેચ પ્રેઝન્ટેશન સેરેમનીમાં હાજર ન હતા. પાકિસ્તાનના વ્હાઇટ-બોલ હેડ કોચ માઇક હેસને જણાવ્યું કે ભારતીય ટીમનું મેચના અંતે ‘નિરાશાજનક’ વર્તન હતું, જેના કારણે કેપ્ટન સમારોહમાં ગયા ન હતા. અમે સ્પષ્ટપણે મેચના અંતે હાથ મિલાવવા અને મૈત્રીપૂર્ણ વાતચીત કરવા ઉત્સાહિત હતા, પરંતુ આવું બન્યું નહીં.
