IND vs PAK: દેશભરમાં પહેલગામ હુમલાના વિરોધ વચ્ચે આજે ભારત અને પાકિસ્તાન વચ્ચે એશિયા કપનો મહામુકાબલો
દેશભરમાં ચાલી રહેલા વિરોધ અને બહિષ્કારની અપીલ વચ્ચે આજે એશિયા કપ 2025માં ભારત અને પાકિસ્તાન વચ્ચે ક્રિકેટનો મહામુકાબલો યોજાવા જઈ રહ્યો છે. જમ્મુ અને કાશ્મીરના પહેલગામમાં થયેલા આતંકવાદી હુમલા બાદ આ મેચનો ભારતમાં વ્યાપક વિરોધ થઈ રહ્યો છે. આ હુમલામાં 26 નિર્દોષ પ્રવાસીઓનાં મૃત્યુ થયાં હતાં, જેના કારણે બંને દેશો વચ્ચેના સંબંધોમાં ભારે તણાવ જોવા મળી રહ્યો છે.
‘ઓપરેશન સિંદૂર’થી સેનાનો જવાબ, હવે ક્રિકેટમાં ‘ઓપરેશન સૂર્યા’
આ આતંકવાદી હુમલાના જવાબમાં ભારતીય સેનાએ ‘ઓપરેશન સિંદૂર’ દ્વારા પાકિસ્તાનને જડબાતોડ જવાબ આપ્યો હતો. હવે આજે ભારતીય ક્રિકેટ ટીમ પણ સૂર્યકુમાર યાદવની આગેવાનીમાં ‘ઓપરેશન સૂર્યા’ દ્વારા પાકિસ્તાની ટીમને કોઈપણ કિંમતે માત આપવા માંગશે.
BCCI અને કેન્દ્ર સરકારની ટીકા, બહિષ્કારની માંગ વધી
આ વિવાદિત મેચનું આયોજન કરવા બદલ ભારતીય ક્રિકેટ કંટ્રોલ બોર્ડ (BCCI) અને મેચ રમવાની મંજૂરી આપવા બદલ કેન્દ્ર સરકાર ટીકાઓનો સામનો કરી રહી છે. આવી પરિસ્થિતિમાં, ભારતીય ટીમે દેશના લોકોની લાગણી અને ગુસ્સાને શાંત કરવા માટે આ મેચ કોઈપણ ભોગે જીતવી જ પડશે.
હજારો ટિકિટો હજુ પણ વેચાયા વગર
પહેલગામ હુમલાના કારણે આ મેચ પ્રત્યે લોકોનો ઉત્સાહ ઘટી ગયો છે. મેચ માટે હજારો ટિકિટો હજી પણ ઉપલબ્ધ છે. સોશિયલ મીડિયા પર લોકો આ મેચનો બહિષ્કાર કરવાની અપીલ કરી રહ્યા છે. આ પરિસ્થિતિને કારણે, યજમાન હોવા છતાં, BCCIના મોટાભાગના અધિકારીઓએ આ મેચથી અંતર જાળવ્યું છે.
