Khatron Ke Khiladi 15: રોહિત શેટ્ટીએ આપ્યા ગુડ ન્યુઝ, ‘બિગ બોસ 19’ ના સેટ પર ‘ખતરોં કે ખિલાડી’ની નવી સિઝનની કરી જાહેરાત
ફિલ્મ ડાયરેક્ટર રોહિત શેટ્ટીએ જાહેરાત કરી છે કે લોકપ્રિય રિયાલિટી શો ‘ખતરોં કે ખિલાડી 15’ આવતા વર્ષે પાછો ફરશે. આ જાહેરાત સાંભળીને શોના લાખો ચાહકો ખુશ થઈ ગયા છે. રોહિત શેટ્ટીએ આ મોટી જાહેરાત ‘બિગ બોસ 19’ ના ‘વીકએન્ડ કા વાર’ એપિસોડ દરમિયાન કરી હતી. તેઓ સલમાન ખાનની ગેરહાજરીને કારણે તે વીકએન્ડ કા વારને હોસ્ટ કરી રહ્યા હતા.
2026માં આવશે ‘ખતરોં કે ખિલાડી 15’
રોહિત શેટ્ટીએ દર્શકોને સંબોધતા કહ્યું કે તેઓ જોઈ રહ્યા હતા કે ચાહકો આ વર્ષે ‘ખતરોં કે ખિલાડી’ ની નવી સિઝન ન થવાથી નારાજ હતા. પરંતુ તેમણે સ્પષ્ટ કર્યું કે આવતા વર્ષે એટલે કે 2026માં ‘ખતરોં કે ખિલાડી’ ફરી એકવાર નવી સિઝન સાથે આવશે. આ જાહેરાત એક ચર્ચા પછી થઈ જેમાં નિર્દેશક-નિર્માતાએ ‘બિગ બોસ’ ના કેટલાક સ્પર્ધકોના રિયાલિટી શોમાં જોડાવાની સંભાવના પર ચર્ચા કરી હતી. તેમણે સ્પર્ધકોને જોઈને કહ્યું હતું કે તેઓ ‘ખતરોં કે ખિલાડી’ માં જોડાઈ શકે છે.
‘બિગ બોસ’ ના સેટ પર શોની વાપસીની જાહેરાત કરવાના રોહિત શેટ્ટીના નિર્ણયથી સંકેત મળે છે કે ‘ખતરોં કે ખિલાડી’ નું પ્રસારણ કલર્સ અને જિઓ હોટસ્ટાર પર પણ ચાલુ રહેશે. જોકે શો 2026 માં કયા મહિને કે કઈ તારીખે પ્રસારિત થશે, તે વિશે કોઈ પુષ્ટિ કરવામાં આવી નથી. પરંતુ એવું લાગી રહ્યું છે કે બિગ બોસની હાલ ચાલી રહેલી સિઝન સમાપ્ત થયા બાદ તેનું પ્રસારણ કરવામાં આવી શકે છે.
‘ખતરોં કે ખિલાડી’ 2008 થી પ્રસારિત થઈ રહ્યું છે. આ શોની 14મી સીઝન 2024 માં પૂર્ણ થઈ હતી. આ વર્ષે શો ટેલિવિઝન પર ન આવવાને કારણે શો બંધ થવાની અટકળો લાગી રહી હતી, જેના પર હવે રોહિત શેટ્ટીએ પૂર્ણવિરામ મૂકી દીધો છે અને જણાવ્યું છે કે તે 2026માં પરત પરશે.
