આજે 1 નવેમ્બરથી ખિસ્સા પર થશે સીધી અસર! બેંકિંગ, આધાર, GST અને SBI કાર્ડ સહિત આ મોટા નિયમો બદલાયા
આજથી એટલે કે 1 નવેમ્બર, 2025થી નવો મહિનો શરૂ થઈ ગયો છે અને તેની સાથે જ દેશભરમાં ઘણા મહત્વપૂર્ણ ફેરફારો લાગુ થઈ ગયા છે. આ ફેરફારોની સીધી અસર તમારા બેંકિંગ, નાણાકીય વ્યવહાર, કાર્ડનો ઉપયોગ અને સરકારી દસ્તાવેજોના અપડેટ પર પડશે. સરળ શબ્દોમાં કહીએ તો, નવેમ્બરથી કેટલીક સેવાઓ મોંઘી બની શકે છે, જ્યારે કેટલીક પ્રક્રિયાઓ સરળ બનશે.
જો તમે આ બદલાયેલા નિયમોથી સમયસર અપડેટ નહીં થાઓ, તો તમને મુશ્કેલીનો સામનો કરવો પડી શકે છે. 1 નવેમ્બરથી લાગુ થતા આ મુખ્ય ફેરફારોની વિગતો અહીં જાણો.
આધાર કાર્ડ અપડેટના નિયમો સરળ બન્યા
યુનિક આઇડેન્ટિફિકેશન ઓથોરિટી ઑફ ઇન્ડિયા (UIDAI) એ આધાર અપડેટ પ્રક્રિયાને સરળ બનાવી છે. હવે નામ, સરનામું, જન્મ તારીખ અને મોબાઇલ નંબર જેવી મહત્વપૂર્ણ માહિતી ઓનલાઈન અપડેટ કરી શકાશે, જેના માટે આધાર કેન્દ્રની મુલાકાત લેવાની જરૂર નહીં રહે.
નવી સિસ્ટમ હેઠળ, UIDAI દ્વારા તમારી આપેલી માહિતીની ચકાસણી પાન કાર્ડ, પાસપોર્ટ, રેશન કાર્ડ અને શાળાના રેકોર્ડ જેવા સરકારી ડેટાબેઝ દ્વારા આપોઆપ કરવામાં આવશે, જેથી દસ્તાવેજો અપલોડ કરવાની જરૂરિયાત ઘટી જશે. જોકે, બાયોમેટ્રિક વિગતો (ફિંગરપ્રિન્ટ્સ અથવા આઇરિસ સ્કેન) બદલવા માટે આધાર કેન્દ્રની મુલાકાત લેવી હજુ પણ ફરજિયાત રહેશે.
બેંક ખાતાઓમાં 4 નોમિનીનો વિકલ્પ
બેંકિંગ કાયદા (સુધારા) અધિનિયમ 2025 હેઠળ બેંકિંગ ક્ષેત્રમાં મોટો ફેરફાર આવ્યો છે. 1 નવેમ્બરથી, ગ્રાહકો તેમના બેંક ખાતા, લોકર અને સેફ કસ્ટડી માટે એકને બદલે ચાર (4) જેટલા નોમિની નિયુક્ત કરી શકશે. ગ્રાહકો દરેક નોમિનીને મળનારી રકમનો ટકાવારી હિસ્સો પણ નક્કી કરી શકશે. જો પહેલા નોમિનીનું મૃત્યુ થાય, તો તેમનો હિસ્સો આપોઆપ બીજા નોમિનીને ટ્રાન્સફર થઈ જશે.
LPGના ભાવમાં ફેરફાર
દર મહિનાની પહેલી તારીખે ગેસ એજન્સીઓ ભાવની સમીક્ષા કરતી હોય છે. 1 નવેમ્બર, 2025ના રોજ કોમર્શિયલ LPG સિલિન્ડરના ભાવમાં 5 રૂપિયાનો ઘટાડો કરવામાં આવ્યો છે.
SBI કાર્ડ પેમેન્ટ પર વધારાના શુલ્ક
SBI કાર્ડનો ઉપયોગ કરતા ગ્રાહકો માટે 1 નવેમ્બરથી કેટલાક ટ્રાન્ઝેક્શન મોંઘા બનશે. MobiKwik અથવા CRED જેવી થર્ડ-પાર્ટી એપ્લિકેશનો દ્વારા શિક્ષણ સંબંધિત ચુકવણી કરવા પર હવે 1% ચાર્જ વસૂલવામાં આવશે. જોકે, શાળાની વેબસાઇટ કે POS મશીન દ્વારા સીધી ચુકવણી કરવા પર કોઈ ચાર્જ લાગશે નહીં. ₹1,000 થી વધુના વોલેટ બેલેન્સ પર પણ 1% ચાર્જ લાગુ થશે.
GST માં મોટા માળખાગત ફેરફારો
1 નવેમ્બરથી, ગુડ્સ એન્ડ સર્વિસ ટેક્સ (GST) માળખામાં મોટા ફેરફારો લાગુ થઈ રહ્યા છે. ચાર-સ્લેબ GST સિસ્ટમ નાબૂદ કરવામાં આવશે, જેમાં હવે બે સ્લેબ વત્તા એક ખાસ દર હશે. 12% અને 28%ના સ્લેબ દૂર કરવામાં આવશે. લક્ઝરી અને સિન ગુડ્સ પર હવે વધારાનો 40% ટેક્સ સ્લેબ લાગુ થશે.
નવેમ્બર 2025 બેંક હોલિડે લિસ્ટ
રિઝર્વ બેંક ઓફ ઈન્ડિયા (RBI) દ્વારા જાહેર કરાયેલા શેડ્યૂલ અનુસાર, નવેમ્બર 2025 દરમિયાન દેશભરની બેંકો કુલ 11 દિવસ માટે બંધ રહેશે. ગુજરાતમાં બેંકોમાં 7 દિવસ રજા રહેશે. આ રજાઓ મુખ્યત્વે તહેવારો અને વીકએન્ડને કારણે છે. તેમ છતાં, ગ્રાહકો માટે ઓનલાઈન બેંકિંગ, UPI અને ATM જેવી તમામ ડિજિટલ સેવાઓ ચાલુ રહેશે.
પેન્શનરો માટે જીવન પ્રમાણપત્ર ફરજિયાત
કેન્દ્ર અને રાજ્ય સરકારના પેન્શનરો માટે 1 નવેમ્બરથી 30 નવેમ્બર સુધીનો સમયગાળો ખૂબ જ મહત્વપૂર્ણ છે. પેન્શનરોએ નવેમ્બરના અંત સુધીમાં જીવન પ્રમાણપત્ર (Life Certificate) સબમિટ કરવું આવશ્યક છે, અન્યથા તેમનું પેન્શન રોકી શકાય છે. NPS માંથી UPS યોજનામાં શિફ્ટ થવા માંગતા કર્મચારીઓએ પણ નવેમ્બર સુધીમાં આ પ્રક્રિયા પૂર્ણ કરવી પડશે.
PNB લોકર ચાર્જમાં ઘટાડો
પંજાબ નેશનલ બેંક (PNB)ના ગ્રાહકો માટે સારા સમાચાર છે. PNB તેના લોકર ચાર્જ ઘટાડી રહી છે. કદ અને શ્રેણીના આધારે નવા દરો નવેમ્બરમાં વેબસાઇટ પર પોસ્ટ કરવામાં આવશે અને સૂચનાના 30 દિવસ પછી અમલમાં આવશે.
ટેલિકોમ ક્ષેત્રે સ્પામ કોલ્સ પર કડક કાર્યવાહી
ગ્રાહકોને અનિચ્છનીય સ્પામ કોલ્સ અને મેસેજથી મુક્ત કરવા માટે ટેલિકોમ કંપનીઓ 1 નવેમ્બરથી કડક પગલાં ભરી રહી છે. તમામ ટેલિકોમ કંપનીઓને સ્પામ નંબરોને સીધા જ બ્લોક કરવાનો નિર્દેશ આપવામાં આવ્યો છે, જેથી અનિચ્છનીય મેસેજ કે કોલ ગ્રાહકો સુધી પહોંચે તે પહેલાં જ અટકી જાય.
મ્યુચ્યુઅલ ફંડમાં પારદર્શિતા માટે SEBIના નવા નિયમો
રોકાણકારોના હિતોનું રક્ષણ કરવા માટે સિક્યોરિટીઝ એન્ડ એક્સચેન્જ બોર્ડ ઓફ ઇન્ડિયા (SEBI) એ મ્યુચ્યુઅલ ફંડ ક્ષેત્રમાં પારદર્શિતા વધારવા માટે નવા નિયમો લાગુ કર્યા છે. 1 નવેમ્બરથી, જો કોઈ એસેટ મેનેજમેન્ટ કંપની (AMC) ના અધિકારી, કર્મચારી અથવા તેમના પરિવારના સભ્ય ₹15 લાખથી વધુનો નાણાકીય વ્યવહાર કરશે, તો કંપનીએ તેની જાણ પાલન અધિકારીને કરવી પડશે.
