ICC ટેસ્ટ રેન્કિંગ: ઋષભ પંત ICC રેન્કિંગમાં આગળ વધ્યો, જસપ્રીત બુમરાહનું શાસન ચાલુ રહ્યું
ભારતના આક્રમક વિકેટકીપર-બેટ્સમેન ઋષભ પંત બુધવારે આંતરરાષ્ટ્રીય ક્રિકેટ કાઉન્સિલની નવીનતમ બેટિંગ રેન્કિંગમાં એક સ્થાન આગળ વધીને છઠ્ઠા સ્થાને પહોંચી ગયા છે. ગયા અઠવાડિયે ઇંગ્લેન્ડ સામે એક જ ટેસ્ટની બંને ઇનિંગ્સમાં સદી ફટકારનાર પંતના કારકિર્દીના શ્રેષ્ઠ 801 રેટિંગ પોઇન્ટ છે. તે ટોચના સ્થાને રહેલા ઇંગ્લેન્ડના જો રૂટથી માત્ર 88 પોઇન્ટ પાછળ છે. પંતે જુલાઈ 2022 માં કારકિર્દીની શ્રેષ્ઠ પાંચમી રેન્કિંગ હાંસલ કરી હતી. ઓપનર યશસ્વી જયસ્વાલ ચોથા સ્થાને યથાવત છે અને બેટ્સમેનોની યાદીમાં ટોચના ભારતીય છે.
ગિલ 21મા સ્થાને
કેપ્ટન શુભમન ગિલ એક સ્થાન ગુમાવ્યા બાદ 21મા સ્થાને છે. ભારત સામે હેડિંગ્લી ટેસ્ટમાં 28 અને અણનમ 53 રન બનાવનાર રૂટે તેના ઇંગ્લેન્ડના દેશબંધુ હેરી બ્રુક પર 15 પોઇન્ટની લીડ જાળવી રાખી છે, જે બીજા સ્થાને છે. ભારત સામેની પ્રથમ ટેસ્ટની બીજી ઇનિંગમાં ૧૪૯ રનની મેચવિનિંગ ઇનિંગ રમનાર ઇંગ્લેન્ડના ઓપનર બેન ડકેટ કારકિર્દીના શ્રેષ્ઠ આઠમા સ્થાને છે.
જસપ્રીત બુમરાહ પ્રથમ સ્થાને
બોલિંગ રેન્કિંગમાં, ભારતના ઝડપી બોલિંગ આક્રમણના નેતા જસપ્રીત બુમરાહ ૯૦૭ રેટિંગ પોઈન્ટ સાથે ટોચ પર છે. તેમણે ઇંગ્લેન્ડ સામેની પ્રથમ ટેસ્ટની પ્રથમ ઇનિંગમાં પાંચ વિકેટ લીધી હતી. દક્ષિણ આફ્રિકાના કાગીસો રબાડા અને ઓસ્ટ્રેલિયાના કેપ્ટન પેટ કમિન્સ અનુક્રમે બીજા અને ત્રીજા સ્થાને છે.
જોશ હેઝલવુડ એક સ્થાન ઉપર આવીને ચોથા સ્થાને પહોંચી ગયા છે. તેમણે પાકિસ્તાનના સ્પિનર નોમાન અલીને પાછળ છોડી દીધા છે. દરમિયાન, ભારતના રવિન્દ્ર જાડેજા પણ ટેસ્ટ ઓલરાઉન્ડરની યાદીમાં ટોચ પર છે.
