ગુજરાતમાં શિયાળાનું વહેલું આગમન, તાપમાન 20 ડિગ્રીએ પહોંચતા ગુલાબી ઠંડીનો અહેસાસ, દિવસે બેવડી ઋતુનો અનુભવ
ગુજરાતમાં આ વર્ષે ચોમાસાની સિઝન લાંબી ચાલ્યા બાદ હવે શિયાળાનું પણ વહેલું આગમન થવાના સંકેતો મળી રહ્યા છે. સામાન્ય રીતે દિવાળી પછી ઠંડીની શરૂઆત થતી હોય છે, પરંતુ આ વખતે મોડી રાત્રે અને વહેલી સવારે અત્યારથી જ ગુલાબી ઠંડીનો અનુભવ થવા લાગ્યો છે.
હવામાન ખાતાના આંકડાઓ અનુસાર, ગત વર્ષની સરખામણીએ આ વખતે લઘુતમ તાપમાનમાં આશરે 5 ડિગ્રી જેટલો નોંધપાત્ર ઘટાડો જોવા મળ્યો છે. ગયા વર્ષે 12 ઓક્ટોબરના રોજ અમદાવાદ સહિતના મોટાભાગના શહેરોમાં લઘુતમ તાપમાન 25થી 26 ડિગ્રી સુધી નોંધાયું હતું, જે ચાલુ વર્ષે 20થી 21 ડિગ્રી આસપાસ નોંધાઈ રહ્યું છે.
આંકડાઓ પર નજર કરીએ તો, અમદાવાદમાં મહત્તમ તાપમાન ૩૪.૩ ડિગ્રી અને લઘુતમ તાપમાન 21.4 ડિગ્રી નોંધાયું છે. જ્યારે ગાંધીનગરમાં મહત્તમ તાપમાન 35 ડિગ્રી અને લઘુતમ તાપમાન 20.3 ડિગ્રી નોંધાયું છે. દિવસ અને રાત્રીના તાપમાન વચ્ચે 13 ડિગ્રી જેટલો મોટો તફાવત રહેતા શહેરીજનો બેવડી ઋતુનો અહેસાસ કરી રહ્યા છે, એટલે કે દિવસે ગરમી અને રાત્રે ઠંડીનો ચમકારો વર્તાઈ રહ્યો છે.
મહત્ત્વની વાત એ છે કે, ગયા વર્ષે આ સમયે રાત્રે પણ ગરમીનો વર્તારો રહેતો હતો. ગત વર્ષે 12 ઓક્ટોબરે ભૂજનું લઘુતમ તાપમાન 27.1 ડિગ્રી સુધી પહોંચ્યું હતું, જ્યારે આ વર્ષે ઠંડીનો પારો વહેલો નીચે ઉતર્યો છે. વહેલા શિયાળાની શરૂઆત થતાં લોકોને ગરમીમાંથી રાહત મળી છે અને વર્ષો પહેલાની જેમ દિવાળી પહેલા જ ઠંડીનો ક્રમ ફરી જોવા મળ્યો છે.
